Tum sang the toh jeevan tha,

Tum sang the tab hi toh jeevan tha !

Vo hasna, vo rona,

Kabhi roothna – manana,

Naraaz hona fir dur reh bhi na paana,

Vo baatein, vo raatein,

Sang jeene ki ek hasrat,

Har khwaab ka koi maksad tha,

Tum sang the toh jeevan tha

Tum sang the tab hi toh jeevan tha…!

Na hone se tumhare,

Mere bhitar khalipansa hai,

Aas paas shor toh hai par mann me akelapan sa hai,

Tasveero me aur yaado me jhalkiyaa tumhari tatolti hu,

Jo sang tumhare chali gayi hai us muskaan ko beeti baato me khojti hu,

Tum na aa paoge duniya me dobara dil ko mere ehsaas toh hai

Fir bhi ek aakhri bar tumhe jee bhar dekhne ki ek namumkin si khwahish, mann me dabi ek aas toh hai !

Kyunki jab tum sang the toh jeevan tha,

Tum sang the isliye hi mere humsafar Mera jeevan tha !

– Sonali Bakshi

11- 08- 2023